Aalmugiäláttâh
Jis tun jieh finnii pargoiäláttuv tâi jis tot lii ucce, te Kela máksá tunjin aalmugiäláttuv.
Tun puávtáh finniđ aalmugiäláttuv oles mere tuše, jis tun finniih pargoiäláttuvâid vuála 66 eurod mánuppaajeest. Jis tun finniih pargoiäláttuvâid eenâb, te aalmugiäláttâh lii ucceeb tâi jieh finnii tom ollágin.
Aalmugiäláttuv oles meeri lii suulân 776 eurod mánuppaajeest. Jis tust lii pelikyeimi tâi ávuskyeimi, te aalmugiäláttuv oles meeri lii suulân 693 eurod mánuppaajeest.
Aalmugiäláttâh puáhtá leđe ucceeb, jis tun lah váldám aalmugiäláttuv toledum puárásijiäláttâhân ađai ovdil 65 ive ahe.
Aalmugiäláttâh puáhtá leđe ucceeb meid talle, jis tun lah aassâm olgoenâmijn. Meid varrim olgoenâmáid puáhtá vaiguttiđ aalmugiäláttâhân, maid tun finniih.
Koijâd Kela palvâlemnumerist, ete maht olgoenâmijn aassâm vaaigut aalmugiäláttâhân. Palvâlemnummeer lii 020 634 0200.
Aalmugiäláttuv ucedeh
- pargoiäláttâh
- eres iäláttuvah já sajanmáávsuh, maid tun finniih.
Aalmugiäláttuv iä ucceed
- pelikyeimi puáđuh
- iäláttâh, mii lii čoggâšum párnáá tipšom ääigisth
- uápui jotteem ääigi nurrum iäláttâh
- pargonavcâttesvuotâiäláttuv kerdialedem.
Kela iäláttuvâin já pargoiäláttuvâin piärroo viäru.
Aalmugiäláttuv puáturääjih
Tun puávtáh finniđ aalmugiäláttuv, jis tuu eres aalmugiäláttâhân vaigutteijee iäláttuvah já sajanmáávsuh láá ucebeh ko čuávuvááh puáturääjih:
- suulân 1 435 eurod mánuppaajeest, jis tust lii ávuspelikyeimi tâi näimipelikyeimi
- suulân 1 601 eurod mánuppaajeest, jis tun aasah ohtuu.
Puáturääjih sättih leđe ucebeh, jis tun lah aassâm olgoenâmijn. Puáturääjih sättih leđe motomijn tiilijn meid stuárráábeh.
Kela meerrid aalmugiäláttuvâst tâi táhádâsiäláttuvâst iäskán ko lii čielgâs, ete mon ennuv tun finniih eres iäláttuvâid.
Luuvâ lase aalmugiäláttuv euromeerijn já puáturaajijn (suomâkielân).