Kela-aaʹšši håiddmõš nuuʹbb peäʹlest
Nuʹbb ooumaž vuäitt håiddad Kela-aaʹššääd peäʹlstad, jos jiõk vueiʹt leʹbe haaʹled håiddad tõiʹd jiõčč.
Jos leäk
- vuâlla 15 eeʹǩǩed, huõlteejad håidd aaʹššääd
- 15–17 eeʹǩǩed, vuäitak håiddad jiijjad aaʹššid jiõčč leʹbe huõlteejad vuäitt håiddad tõiʹd
- 18 eeʹǩǩed leʹbe puärrsab, vuäitak uʹvdded nuuʹbb ooumže lååʹv håiddad aaʹššääd
- 18 eeʹǩǩed leʹbe puärrsab da jiõk pââʹst håiddad aaʹššääd jiõčč, Digi- da meerteâttkoontâr (DVV) leʹbe duõmmišttâm vuäitt mieʹrreed tuʹnne ouddõsǩiõčči.
Nuuʹbb peäʹlest vuäitt äʹššeed teʹlfoonâst, kääzzkõspääiʹǩest leʹbe ǩeeʹrj mieʹldd. Neeʹttest äʹššummuš lij måttmi paaiʹǩi vueiʹtlvaž nuuʹbb oummu peäʹlest.
Vueʹllâkksa peäʹlest äʹššummuš
Huõlteei vuäitt håiddad pukid vuâlla 15-âkksa päärna aaʹššid teʹlfoonâst, kääzzkõspääiʹǩest da ǩeeʹrj mieʹldd. Jos huõlteei rääjj ooccmõõžž päärna peäʹlest, ooccmõš âlgg vuõltteed pååʹšt mieʹldd leʹbe puʹhtted kääzzkõspäikka.
Huõlteei vuäitt håiddad koid-ne vueʹllâkksaž päärnžes aaʹššid OmaKelast.
Jos päärnaž lij 15–17 eeʹǩǩed, son vuäitt nuʹtt haaʹleen håiddad aaʹššeez jiõčč. Jos päärnast lij jiiʹjjes raavâs tobddõõttmõõžž neävv, mâʹte neʹttbaŋkktiõtt leʹbe mobiilstaanõk, son vuäitt håiddad jiiʹjjes Kela-aaʹššid OmaKelast.
Tiuddâkksa peäʹlest äʹššummuš väʹlddouddmõõžžin
Jos leäk 18 eeʹǩǩed leʹbe puärrsab, vuäitak uʹvdded nuuʹbb ooumže lååʹv leʹbe uʹvdded vääʹld suʹnne håiddad tuu aaʹššid. Vuäitak še uʹvdded vääʹld määŋgaid jeeʹres oummuid. Vääʹld vuäǯǯam ooumaž âlgg leeʹd ooʹccmõsân 18 eeʹǩǩed.
Vuäitak uʹvdded vääʹld nuuʹbb ooumže
- väʹlddǩiiʹrjin, koin son vuäitt håiddad aaʹššääd teʹlfoonâst, kääzzkõspääiʹǩest leʹbe pååʹšt mieʹldd
- Suomi.fi-väʹlddouddmõõžžin, koin son vuäitt håiddad aaʹššääd OmaKelast.
Looǥǥ lââʹzz väʹlddǩeeʹrj raajjmõõžžâst.
Looǥǥ lââʹzz nuuʹbb peäʹlest äʹššummšest OmaKelast.
Ouddõsǩiõččâmväʹldd
Jos haaʹlääk nuuʹbb ooumže uʹvdded vääʹld nåkam pääiʹǩ vääras, što jiõk jiõčč pââʹst håiddad aaʹššääd, vuäitak raajjâd ouddõsǩiõččâmväʹlddouddmõõžž. Looǥǥ lââʹzz ouddõsǩiõččâmvääʹldest DVV seeidain (lääddas).
Jos väʹlddǩeʹrjj âânn seʹst tällõõzzlaž aaʹšši håiddmõõžž, tõin vuäitt håiddad Kela-aaʹššid, ko DVV lij raavääm väʹlddouddmõõžž.
Ouddõsǩiõččâmväʹldd lij jeeʹres äʹšš ko veerǥlaž ouddõsǩiõčči.
Digi- da meerteâttkoontâr leʹbe duõmmišttâm vuäiʹtte mieʹrreed veerǥlaž ouddõsǩiõčči ooumže, kååʹtt ij pââʹst håiddad aaʹššeez jiõčč.