Pargottesvuotâpeiviruttâ

Pargottesvuotâpeiviruttâ puáhtá leđe tienâspeiviruttâ tâi vuáđupeiviruttâ.

Tienâspeiviruttâ

Tienâspeiviruttâ rekinistoo tiänásij ađai puáđui vuáđuld. Puávtáh finniđ tienâspeiviruuđâ, jis kuulah pargottesvuotâkaasan. Ovdâmerkkân sierâ áámmátsuorgijn láá távjá jieijâs pargottesvuotâkasah. Láá meiddei pargottesvuotâkasah, moid puáhtá kuullâđ kii peri.

Kela ij määvsi tienâspeiviruuđâ, já tom jieh uusâ Kelast.

Pargottesvuotâkassa máksá tienâspeiviruuđâ, jis tun lah lamaš tuárvi kuhháá pargottesvuotâkasa jeessân já tust olášuvá pargoost orroom iähtu. Pargoost orroom iähtu olášume meerhâš tom, ete tun lah lamaš tuárvi kuhháá pargoost ovdil pargotteemmin pääccim.

Tienâspeiviruttâ máksoo enâmustáá 400 peivid. Jis tun lah lamaš pargoost vuálá 3 ive, te tun puávtáh finniđ tienâspeiviruuđâ enâmustáá 300 peivid.

Koijâd lasetiäđuid tienâspeiviruuđâst tuu jieijâd pargottesvuotâkassaast tâi Pargottesvuotâkasai ohtsâšseervist (Työttömyyskassojen yhteisjärjestö, tyj.fi, suomâkielân).

Vuáđupeiviruttâ

Jis tun jieh lah pargottesvuotâkasa jeessân jiehke tun finnii tiänáspeiviruuđâ, te Kela máksá vuáđupeiviruuđâ. Tot máksoo enâmustáá 400 peivid. Jis tun lah lamaš pargoost vuálá 3 ive, vuáđupeiviruttâ máksoo enâmustáá 300 peivid.

Vuáđupeiviruuđâ finniimân láá raijiittâsah, jis tun lah vuálá 25-ihásâš. Täärhist PI-toimâttuvâst, ete puávtáh-uv tun finniđ vuáđupeiviruuđâ.

Luuvâ lase vuáđupeiviruuđâ ucâmist (suomâkielân).

Mon ennuv vuáđupeiviruuđâ finnee?

Vuáđupeiviruttâ lii 37,21 eurod peeivist, já tot máksoo 5 peeivist ohhoost. Jis tust láá päärnih, tun finniih pärnialedem. Tot lii 5,84–11,05 eurod peeivist tađe mield, kalle päärni tust láá.

Vuáđupeiviruutân puáhtá mäksiđ aledemuási, jis tun uásálistáh PI-toimâttuvváin soppum tooimân. Vuáđupeiviruuđâ aledemuási lii 5,29 eurod peeivist. Vuáđupeiviruuđâ aledemuási máksoo enâmustáá 200 peeivist.

Tun máávsáh vuáđupeiviruuđâst viäruid.

Tun puávtáh rekinistiđ Kela nettisiijđoin, ete mon ennuv tun finniih ​​​vuáđupeiviruuđâ (suomâkielân).

Pargoost orroom iähtu

Vâi tun finniih vuáđupeiviruuđâ, te tust kalga olášuđ pargoost orroom iähtu. Pargoost orroom iähtu olášuvá, jis

• tun lah lamaš pargoost ucemustáá 26 okkod majemui 28 mánuppaje ääigi
• tuu pargoäigi lii lamaš ucemustáá 18 tijmed ohhoost
• tuu pälkki lii lamaš syergi pargoiähtusopâmuš miäldásâš tâi ucemustáá 1 331 eurod mánuppaajeest.

Meid porgâm monnii eres EU- tâi Eta-staatâst tâi Sveitsist puáhtá rekinistiđ mieldi.

Pargoost orroom iähtun puáhtá rekinistiđ mieldi pargo meid kuhheeb ääigist ko 28 mánuppaajeest ovdâmerkkân talle, jis:

• tun lah puáccám
• tun lah jottáám uápuid
• tun lah tipšom vuálá 3-ihásii párnád
• tun lah uásálistám PI-toimâttuvváin soppum tooimân.

Irâtteijest lii jieijâs pargoost orroom iähtu. Jis tun lah irâtteijee, te täärhist vuáđupeiviruuđâ iävtuid Kelast.

Pargotteemmin olgoenâmijn

Pargottesvuotâpeiviruttâ máksoo motomijn tábáhtusâin meid talle, ko tun lah olgoenâmijn já uusah tobbeen pargo.

Tun puávtáh koijâdiđ lase palvâlemnumerist 020 692 210.